የሱዳኑ ምክትል የውጭ ጉዳይ ሚኒስትር ከኢትዮጵያ አምባሳደር ጋር ተወያዩ

የሱዳን ምክትል የውጭ ሚኒስትር ለኢትዮ-ሱዳን ሁለትዮሽ ግንኙነት መጠናከር እንደሚሰሩ ቃል ገብተዋል

የሱዳን ምክትል የውጭ ጉዳይ ሚኒስትር አምባሳደር ዳፋላህ አል ሀጅ አሊ በሱዳን የኢትዮጵያ አምባሳደር ይበልጣል አእምሮ አለሙን በዛሬው እለት በጽህፈት ቤታቸው ተቀብለው በተለያዩ ጉዳዮች ዙሪያ ተወያይተዋል፡፡

አምባሳደር ዳፋላህ አል ሀጅ አሊ በሱዳን የውጭ ጉዳይ ሚኒስቴር መስሪያ ቤት ምክትል የውጭ ሚኒሰትር ሆነው በቅርቡ የተሸሙ ዲፕሎማት መሆናቸው ይታወቃል፡፡

• ኢትዮጵያ “የሱዳን ወታደሮች የተገደሉት ወደ ድንበሬ ዘልቀው በመግባታቸው ነው” አለች

በዚህም የኢትዮጵያው አምባሳደር ይበልጣል አእምሮ ፤ አምባሳደር ዳፋላህ የሱዳን ምክትል የውጭ ጉዳይ ሚኒስትር ሆነው በመሾማቸው እንኳን ደስ አለዎት ብለዋቸዋል ።

የኢትዮጵያ አምባሳደር ለገለጹላቸው የደስታ ምኞት ያመሰገኑት ምክትል የውጭ ጉዳይ ሚኒሰትሩ በበኩላቸው፤ ሁለቱም ሀገራት ካላቸው ታሪካዊ ትስስር እንዳላቸው አስታውቀዋል።

የኢትዮ-ሱዳን የሁለትዮሽ ግንኙነት ለማጠናከር እና ጥቅም ለማስከበር እንደሚሰሩም ምክትል የውጭ ጉዳይ ሚኒስትሩ ቃል ገብተዋል፡፡

• ሱዳን በኢትዮጵያ የተገደሉባትን ወታደሮች አስመልክታ “ለፀጥታው ምክር ቤት ላመለክት ነው” አለች

ሱዳን በቅርቡ በኢትዮጵያ የተገደሉ ወታደሮቿን አስመልክቶ ባወጣችው መግለጫ፤ በካርቱም ያለውን የኢትዮጰያን አምባሳደር ለምን የሱዳን ጦር በኢትዮያ እንደተገደሉ ተጨማሪ ማብራሪያ እንደሚቀበልም ማስታወቁ ይታወሳል።

ሁኖም ግን የዛሬው የሱዳን ምክትል የውጭ ጉዳይ ሚኒስትር እና የኢትዮጵያ አምባሳደር ውይይት በዚህ ጉዳይ ስለመሆኑ የተገለፀ ነገር የለም።