የተባበሩት አረብ ኤምሬቶች በፀጥታው ም/ቤት ተለዋጭ አባል ሆና ተመረጠች

ዩኤኢ በለመደችው የዓለም አቀፍ ተሳትፎ እና የትብብር መንፈስ እንደምትሰራ ሼክ ሞሃመድ ቢን ዛይድ ገልጸዋል

የተባበሩት አረብ ኤምሬቶች ለሁለት ዓመታት በተባበሩት መንግስታት የፀጥታው ም / ቤት ውስጥ የተለዋጭ አባልነት መቀመጫ እንዲኖራት ተመርጣለች፡፡

“የተባበሩት መንግስታት ድርጅት ዛሬ ሰኔ 4 ቀን 2013 ዓ.ም ዩኤኢን ለ 2022-2023 የፀጥታው ም/ቤት ከአምስት አባላት አንዷ እንድትሆን መርጧል” ሲሉ የአቡዳቢ ዘውዳዊ ልዑል እና የዩኤኢ ጦር ምክትል ጠቅላይ አዛዥ ሼክ ሞሃመድ ቢን ዛይድ በትዊተር አድራሻቸው ገልጸዋል፡፡ “ቁርጠኛ ዲፕሎማቶቻችን ፣ የተባበሩት አረብ ኤምሬቶች ከተመሠረተችበት 1971 ጀምሮ የተመራችበትን የዓለም አቀፍ ተሳትፎ እና የትብብር መንፈስ እንደሚከተሉ ቃል እንገባለን” ሲሉም ገልጸዋል፡፡

የስካይ ኒውስ መረጃ እንደሚያመለክተው ዩኤኢ ለፀጥታው ም / ቤት ተለዋጭ አባልነት የተመረጠችው የተባበሩት መንግስታት ድርጅት ጠቅላላ ጉባዔን 179 ድምጽ በማግኘት ነው፡፡

ሀገሪቱ እ.ኤ.አ. በመስከረም ወር 2020 መጨረሻ ላይ ነበር ከ 2022 እስከ 2023 ባለው ጊዜ ውስጥ ለተባበሩት መንግስታት የፀጥታው ም/ቤት ቋሚ ያልሆነ መቀመጫ እጩ መሆኗ የታወቀው፡፡

ከተባበሩት ዓረብ ኤምሬቶች በተጨማሪ አልባኒያ፣ ብራዚል፣ ጋቦን እና ጋናም በተለዋጭ አባልነት ተመርጠዋል፡፡ እነዚህ አምስት ሀገራት ኤስቶኒያ፣ ኒጀር፣ ቱኒዚያ፣ ቬትናም እና ሴንት ቪንሴንት ኤንድ ዘ ግሬናዲንስን በመተካት ም/ቤቱን የሚቀላቀሉ ናቸው፡፡

የተባበሩት መንግስታት የፀጥታው ም/ቤት አምስት ቋሚ አባላትን (አሜሪካ ፣ ሩሲያ ፣ ቻይና ፣ ብሪታንያ እና ፈረንሣይ) እና 10 ቋሚ ያልሆኑ አባላትን ፣ ማለትም በድምሩ 15 አባላትን ያቀፈ ነው፡፡