ከጠ/ሚ ዐቢይ ጋር የሚወዳደሩት የየትኞቹ ፖለቲካ ፓርቲ እጩዎች ናቸው?

ቦርዱ የፖለቲካ ፓርቲ እጩዎችን ከሚሳተፈፉበት የምርጫ ክልል ጋር ዝርዝር ይፋ አድርጓል

6ኛ ሀገር አቀፍ ምርጫ የፊታችን ሰኞ ሰኔ 14 ቀን 2013 ዓ.ም ይካሄዳል።

በምርጫው ላይ የሚሳተፉ የፖለቲካ ፓርቲዎች እስከ ትናንት 12 ድረስ የምርጫ ቅስቀሳ እና እጩዎቻቸውን የማስተዋወቅ ስራን አጠናቀዋል።

የኢትዮጵያ ብሄራዊ ምርጫ ቦርድም በዘንድሮው ምርጫ ላይ የሚሳተፉ የፖለቲካ ፓርቲ እጩዎችን ከሚሳተፈፉበት የምርጫ ክልል ጋር ዝርዝር አውጥቷል።

ቦርዱ ያወጣው ዝርዝር ውስጥ የብልጽግና ፓርቲ ፕሬዚዳንት እና ጠቅላይ ሚኒሰትር ዐቢይ አህመድ የሚወዳደሩበት ስፍራ አንዱ ነው።

ጠቅላይ ሚኒሰትር ዐቢይ አህመድ በጎማ 2 የምርጫ ክልል ላይ ለህዝብ ተወካዮች ምክር ቤት ፓርቲያቸውን ወክለው በእጩነት መቅረባቸውንም ከቦርዱ ያገኘነው መረጃ ያመለክታል።

ታዲያ በዚህ የምርጫ ክልል ላይ ሁለት የፖለቲካ ፓርቲዎች እጩዎቻቸውን ለህዝብ ተወካች ምክር ቤት ከጠቅላይ ሚኒስትር ዐብይ ጋር እንዲፎካከሩ ማቅረባቸውም የምርጫ ቦርድ ዝርዝር ያመለክታል።

በምርጫ ክልሉ ላይ የኢትዮጵያ ዜጎች ለማኅበራዊ ፍትህ (ኢዜማ) እና እናት ፓርቲ እጩዎች ከጠቅላይ ሚኒስትሩ ጋር ለመወዳደር መቅረባቸው ታቀዋል።

በዚህም መሰረት አቶ ካሊድ ጀማል ሀይደር የኢትዮጵያ ዜጎች ለማኅበራዊ ፍትህ (ኢዜማ)ን ወክለው በእጩነት የቀረቡ ሲሆን፤ አቶ ዳግም ዋሪሶ ካዎ ደግሞ እናት ፓርቲን ወክለው በእጩነት ቀርበዋል።

ሁለቱ የኢዜማ እና የእናት ፓርቲ እጩዎች ከጠቅላይ ሚኒስተር አቢ አህመድ ጋር ለህዝብ ተወካዮች ምክር ቤት መቀመጫ የሚፎካከሩ ይሆናል።

ኢትዮጵያ 6ኛውን ሀገርአቀፍ ምርጫ በመጭው ሰኞ የምታካሂድ ሲሆን፤ በምርጫው ላይም ለመወዳደርም 47 የፖለቲካ ፓርቲዎች 9 ሺህ 327 እጩዎችን አቅርበዋል።