ወላዶች፤ የሚመገቡት በማጣታቸው ለማጥባት መቸገራቸውን የሰሜን ወሎ ዞን ነዋሪዎች ተናገሩ

ነዋሪዎቹ ከወረራ ነጻ ብንወጣም ለከፋ ችግር ተዳርገናል ብለዋል

በቅርቡ በኢትዮጵያ ጥምር ጦር ነጻ በወጡ የአማራ ክልል የሰሜን ወሎ ዞን አካባቢዎች ከፍተኛ የምግብና የመድሃኒት እጥረት መኖሩን ነዋሪዎች ገለጹ፡፡

ነዋሪዎቹ ሸቀጦች ወደ አካባቢዎቹ እየገቡ ባለመሆኑ ለከፋ ችግር መዳረጋቸውንና አካባቢዎቹ ነጻ ቢወጡም ችግሩ ግን ተባብሶ መቀጠሉን ለአል ዐይን አማርኛ ተናግረዋል፡፡

በሰሜን ወሎ ዞን መርሳ ከተማ ነዋሪ የሆኑና ስማቸውን መግለጽ ያልፈለጉ አንድ ነዋሪ በከተማዋ የሸቀጥ መደብሮችን ጨምሮ ሌሎች ሱቆች እንዳልተከፈቱ፤ ‘ፓራሲታሞል’ን መሰል ማስታገሻ መድሃኒቶችን እንኳን በቀላሉ እንደማይገኙ እና በውድ ዋጋ እየተገዙ እንደሆነ ተናግረዋል፡፡

በህወሓት ታጣቂዎች የተደፈሩ ሴቶች መደፈራቸውን “ሰው ሰማብን” በሚል ይሉኝታ ተይዘው ከቤት እየወጡ እንዳልሆነና ይህንኑ በመፍራት ቀያቸውን ለቀው እየሄዱ መሆኑንም ነዋሪዎች ተናግረዋል፡፡

አሁን ላይ በመርሳ የወንዝ ውሃ ነው እየተጠጣ ያለው እንደ ነዋሪው ገለጻ፡፡ 20 ሊትር የወንዝ ውሃ 50 ብር እየገዛን እንጠጣለንም ብለዋል፡፡

በሰሜን ወሎ ዞን በተለያዩ ወረዳዎች የሚገኙ ነዋሪዎች አካባቢያቸው ነፃ በመውጣቱ ቢደሰቱም መኖሪያ ቤቶቻቸውን ጨምሮ የከተሞቻቸው መውደም እጅግ እንዳሳዘናቸው ገልጸዋል፡፡ “የሚበላም ሆነ የሚጠጣ ነገር” እንደሌላቸውም ነው የገለጹት፡፡

መከላከያው በጊዜያዊነት ወደ ትግራይ ክልል አይገባም ተባለ

የቆቦ ከተማ ነዋሪ የሆነው አቶ ጌታቸው ሕዝቡ ነጻነቱን ቢያገኝም አሁን ላይ ሸቀጥም ሆነ ቤንዚን እንደሌለና እንደተወደደ ለአል ዐይን አማርኛ ገልጿል፡፡ በቆቦና አካባቢው ከ 7 እስከ 10 ኪሎ ሜትር ለሚሆን መንገድ እስከ 50 ብር የሚሆን ዋጋ እየተከፈለ እንደሆነ የገለጸው አቶ ጌታቸው የሕዝብ መገልገያ ተቋማት ከመውደማቸውም በላይ ረዘም ላለ ጊዜ የሚወሰዱ መድሃኒቶች በመታጣታቸው ብዙዎች ለህይወት በሚያሰጋ ችግር ላይ መውደቃቸውንም አንስቷል፡፡

በወልዲያ እና በአካባቢው ተመሳሳይ ችግሮች ማጋጠማቸውንም ነው ነዋሪዎቹ የሚናገሩት፡፡ በኢትዮጵያ ኦርቶዶክስ ተዋሕዶ ቤተክርስቲያን የሰሜን ወሎ፣ የደቡብ ወሎ እና የኦሮሞ ብሔረሰብ አስተዳደር ዞን ሀገረ ስብከት ሊቀጳጳስ ብፁዕ አቡነ ኤርምያስ ያደረጉትን ደጋግመው የሚያነሱት ነዋሪዎቹ “ብጹዕ አባታችን በመበደር ጭምር ነው ህይወታችንን ያቆዩት” ሲሉ ይናገራሉ፡፡

የግዛት አንድነትና ሉዓላዊነት ላይ የሚያሠጋ ነገር ካጋጠመ ሰራዊቱ በማንኛውም ጊዜና ሁኔታ ወደ ትግራይ ክልል ይገባል- ጠ/ሚ ዐቢይ

የወልዲያ አማራ ወጣቶች ማህበር ሊቀመንበር ኤፍሬም አሰፋ አቡነ ኤርሚያስ ከቤተ ክርስቲያንና ከግለሰቦች በመበደር ያኖሯቸው የነበሩ ግለሰቦች አሁን ላይ ስራ ባለመኖሩና ድጋፍ በመታጣቱ ችግር ላይ ወድቀዋል ብሏል፡፡

ወላድ እናቶች በምግብ እጦት ምክንያት ለማጥባት ተቸግረዋል ያለም ሲሆን የንግድ እንቅስቃሴዎች በመቆማቸው ምክንያት ገንዘብ ያላቸው ሰዎች ጭምር መቸገራቸውንና የቀን ስራ በመስራት ኑሯውን ይገፉ የነበሩ ዜጎች አሁን ስራ በመቆሙ ምክንያት ከነቤተሰቦቻቸው ለስቃይ መዳረጋቸውን ለአል ዐይን ተናግሯል፡፡

“የህወሓት ታጣቂዎች ሁሉንም ንብረቶችና ቁሶች ከህዝብ እየቀሙ በመውሰዳቸው መካከለኛ ገቢ ያላቸው ጭምር ለመራብ ተገደዋል” ሲልም ነው የሚያስቀምጠው መብራት ባለመኖሩ “አስፈጭቶ እንኳ ለመብላት” አለመቻሉን በማከል፡፡ የመጠጥ ውሃ በመታጣቱ ሴቶች እና ህጻናት አዛውንቶች ጭምር ለተለያዩ የጤና እክሎች እየተዳረጉ ይገኛሉም ብሏል፡፡

የአማራ ክልል አደጋ መከላከል ምግብ ዋስትና ኮሚሽነር ዘላለም ልጃለም ችግር ላይ ላሉ ዜጎች በወር 1 ነጥብ 2 ሚሊዮን ኩንታል እህል እንደሚያስፈልግ ገልጸዋል ከሰሞኑ በሰጡት መግለጫ፤ ሁኔታው ከኮሚሽኑ አቅም በላይ መሆኑን በመጠቆም፡፡ ነጻ የወጡ አካባቢ ነዋሪዎች የረሃብ አደጋ እያጋጠማቸው ነውም ብለዋል ኮሚሽነሩ፡፡

በክልሉ 11 ነጥብ 4 ሚሊዮን ህዝብ አስቸኳይ የምግብ እርዳታ እንደሚያስፈልገው በማንሳትም ኢትዮጵያውያን እጃቸውን እንዲዘረጉ ጠይቀዋል፡፡

ኮሚሽኑ በጦርነቱ ምክንያት ከተፈናቀሉት 2 ነጥብ 3 ሚሊየን የክልሉ ነዋሪዎች ውስጥ ከ160 ሺ በላይ የሚሆኑት ወደ ቀያቸው መመለሳቸውን ገልጾ፤ የማጓጓዝ ስራው እስከ ታህሳስ መጨረሻ እንደሚቀጥል አስታውቋል፡፡

የ2021 ዐበይት ክስተቶች በኢትዮጵያ

ነጻ በወጡ አካባቢዎች እርዳታዎችን ለማድረስ ጥረት እየተደረገ መሆኑን ለአል ዐይን አማርኛ የተናገሩት የብሔራዊ አደጋ ስጋት ስራ አመራር ኮሚሽነር ምትኩ ካሳ በበኩላቸው እስካሁን በመርሳ፣ ወልዲያ፣ ቆቦ፣ ጋሸና፣ ድሬሮቃና ሌሎች ቦታዎች ድጋፎች ደርሰዋል ብለዋል፡፡

ይሁንና ገጠራማ ወደሆኑ አካባቢዎች እርዳታው ገና እየተጓጓዘ እንደሆነ አልሸሸጉም ኮሚሽነር ምትኩ፡፡ ሁሉም ጋር እንደሚደርስም ተናግረዋል፡፡